erena.org

ካብ ኤርትራ ናብ ወጻኢ ሃገር ዝምደቡ ዲፕሎማሰኛታት፣ ስድራቤታቶም ሒዞም ክወጹ ክፍቐደሎም ይሓቱ

Radio Erena: 23 January 2017

MOF

ዲፕሎማሰኛታት መንግስቲ ኤርትራ፣ ናብ ዝተመደብሉ ሃገራት ስድራቤታቶም ሒዞም ክኸዱ ክፍቐደሎም ብተደጋጋሚ ይሓቱ ከምዘለዉ ዲፕሎማስያውያን ምንጭታት ንሬድዮ ኤረና ሓቢሮም።

እቶም ኣምባሳደራት ዝርከብዎም ዲፕሎማሰኛታት፣ ደቆምን ይኹኑ ሰብ ሓዳሮም ሒዞም ናብቲ ዝተመደብሉ ሃገራት ክገሹ፣ ወጻኢታት መንግስቲ ክበዝሕ'ዩ ዝብል ምኽንያት ይወሃቦም እኳ እንተሎ፣ እቲ ኣውራ ጠንቒ ግና ንኸይሃድሙ ብስድራቤታቶም ጅሆ ንምሓዞም ምዃኑ እቶም ምንጭታት ኣረዲኦም።

ካብ ኢትዮጵያ ናብ ሱዳን ዝሰግሩ ዝነበሩ 91 ኤርትራውያን ተጨውዮም

Radio Erena: 23 January 2017

Eastern Su

ካብ ኢትዮጵያ ናብ ሱዳን ዝሰግሩ ዝነበሩ 91 ኤርትራውያን ስደተኛታት፣ መንነቶም ብዘይተፈልጠ ዕጡቓት ምብራቕ ሱዳን ከምዝተታሕዙ ንስደተኛታት ዝጣበቕ ትካል ኣፍሊጡ።

ብመሰረት እቲ 'The Eritrean Initiative on Refugee Rights' (EIRR) ዝተባህለ ትካል፣ ናብ ሬድዮ ኤረና ዝልኣኾ ሓበሬታ፣ እቶም 11 ቆልዑን 25 ደቂንስትዮን ዝርከብዎም ኤርትራውያን ስደተኛታት፣ ካብ ኢትዮጵያ ተበጊሶም ናብ ሱዳን ድሕሪ ምእታዎም'ዮም፣ ዝሓለፈ ሰሙን ኣብ ምብራቕ ሱዳን ተታሒዞም።

ራሻይዳን ካልኦት ዝተፈላለዩ ዕጡቓትን፣ ኣብ ምብራቕ ሱዳን ስደተኛታት ብምጭዋይ፣ ስድራቤታቶም ገንዘብ ክኸፍሉሎም ከምዘገድዱ ዝፍለጥ'ዩ።

ካብ ስልጣን ንምእላይ ሓንጊዱ ዝጸንሐ መራሒ ጋምብያ ሃዲሙ

Radio Erena: 23 January 2017

Gam Ex

ኣብ ምርጫ ድሕሪ ምስዓሩ፣ ካብ ስልጣን ምውራድ ሓንጊዱ ዝጸንሐ ፕረዚደንት ጋምብያ ያሕያ ጃመህ፣ ጎረባብቲ ሃገራት ወትሃደራተን ናብታ ሃገር ክልእካ ድሕሪ ምጅማረን ሃዲሙ።

እቲ ፕረዚደንት፣ ጎረባብቲ ሃገራት ብፍላይ ናይጀርያን ሰኔጋልን ፣ ስልጣኑ ብሰለማዊ መንገዲ ከረብ ከካይዳሉ ንዝጸንሓ ተደጋጋሚ ዲፕሎማስያዊ ጻዕርታት ድሕሪ ምንጻጉ፣ እተን ጎረባብቲ ሃገራት ብወትሃደራዊ ጎነጽ ክኣልዮ'የን ተበጊሰን።

ኣብ ምርጫ ዝተዓወተ ኣዳማ ባሮው፣ ኣብ ሰኔጋል ኣብ ዝርከብ ኤምባሲ ሃገሩ ቃለ መሓለ ድሕሪ ምፍጻሙ፣ ሰኔጋል ነቲ ብምርጫ ህዝቢ ዝተዓወተ መራሒ ናብ ስልጣን ንምድያቡን ነቲ ዝሓንገደ ያሕያ ጃመ ድማ ንምውራዱን፣ ዝሓለፈ ሰመኑን ሰራዊታ ዶብ ጋምብያ ሰጊሩ ኣብ ተጠንቐቕ'ዩ ጸኒሑ።

ስድራቤታት ናይቶም ብ13 ጥሪ ኣብ ዝጠሓለት ጃልባ ዝሞቱ ኤርትራውያን ይርድኡ

Radio Erena: 20 January 2017

Libya

ብዓርቢ 13 ጥሪ ፣ ካብ ሊብያ ተበጊሳ ኣብ ማእከላይ ባሕሪ ኣብ ዝጠሓለት ጃልባ፣ ዝበዝሑ ኤርትራውያን ዝርከብዎም ኣስታት 190 ሰባት ከምዝሞቱ ተረጋጊጹ።

ኣብ ውሽጢ ኤርትራን ወጻኢ ሃገራትን ዝርከቡ ሓይሎ ስድራቤታት እዞም ግዳያት ባሕሪ ሓደጋ ዝኾኑ ኤርትራውያን፣ ይርድኡ ምህላዎም'ውን ክፍለጥ ተኻኢሉ ኣሎ።

ህግደፍ፣ ኣብ ጁባ ንዝነጥፉ ኤርትራውያን ነጋዶ፣ ንምቁጽጻሮም ጻዕርታቱ ይቕጽል

Radio Erena: 20 January 2017

Juba Eritreans

ህግደፍ፣ ኣብ ጁባ ንዝንቀሳቐሱ ኣውፈርቲን ነጋዶን ንምቁጽጻር፣ ዝተፈላለየ ሜላታት እናተጠቕመ ጻዕርታቱ ይቕጽል ከምዘሎ ምንጭታት ሬድዮ ኤረና ሓቢሮም።

እቲ ንስልጣን መንግስቲ ብሒቱ ዝርከብ ህግደፍ፣ ብመንገዲ ኣብታ ሃገር ዝርከብ ኤምባሲ ኣቢሉ፣ ኣብ ጁባ ዝርከቡ ኤርትራውያን ብምሉኦም ክምዝገቡን ዘለዎም ብዝሒ ገንዘብ ወይ ቅሙጥ ሃብቲ ከፍልጡን ተደጋጋሚ ጻውዒት ይገብር ኣሎ።

"ድሕነት ዜጋታት ንምፍላጥ"፣ ብዝብል ጉልባብ፣ ቆጸራ ኣብ ጁባ ናይ ዝርከቡ ኤርትራውያን ንምክያድ ካብ ዝሓለፈ ዓመት ኣትሒዙ ከካይድ እኳ እንተጀመረ፣ ሓያሎ ኤርትራውያን ነጋዶን ኣውፈርትን ግና፣ ሃብትና ንምቁጽጻርን ንምዝማትን'ዩ ካብ ዝብል እምነት ኣይተቐበልዎን።

ኤርትራውያን ደለይቲ ለውጢ፣ ንራብዓይ ዓመት ስርሒት ፎርቶ ይዝክሩ

Radio Erena: 20 January 2017

Asmara Tanks

ኣብ ዝተፈላለያ ሃገራት ዝርከቡ ኤርትራውያን ደለይቲ ለውጢ፣ ን21 ጥሪ፣ መበል ራብዓይ ዓመት ስርሒት ፎርቶ ይዝክሩ ኣለዉ።

እቶም ኤርትራውያ፣ ብመንገዲ ማሕበራዊ ሜድያታትን መራኸቢታትን ኣብ ዘመሓላልፍዎ ዘለው መልእኽታት፣ ስርሒት ፎርቶ፣ ከምቲ ዝተወጠኖ ክዕወት ደኣ ኣይኽኣል እምበር፣ ኣብ ውሽጢ ኤርትራ፣ ብፍላይ ከኣ ኣብ መንጎ ሰራዊት ለውጢ ዝደልዩ ሓይሊ ከምዘሎ ዘግሃደ ፍጻሜ'ዩ ብምባል ይምጉስ።

ንሃንደስትን ፈጸምትን ነቲ ስርሒት ዘለዎም ኣድናቖት ንምግላጽ ከኣ፣ ኣሳእል ናይቲ፣ ኣብቲ ስርሒት ፎርቶ ህይወቱ ዝሓለፈት "ብወዲ ዓሊ" ዝፍለጥ ገዲም ተጋዳላይ ኮለነል ስዒድ ዓሊ ሕጃይ ኣብ ማሕበራዊ ሜድያታት ብብዝሒ ይዝርጋሕ ኣሎ።

"ኣብ ኤርትራ፣ 2 ሚልዮን ህዝቢ ናይ መግቢ ረዲኤት የድልዮ" CARE International

Radio Erena: 19 January 2017

Suff

ኣብ ኤርትራ፣ ክሳብ 2016 ኣብ ዝነበረ ግዜ፣ ኣስታት 2 ሚልዮን ህዝቢ ናይ መግቢ ረድኤት ከምዘድልዮ CARE International ዝተባህለ ኣህጉራዊ ትካል ገሊጹ።

እቲ ትካል፣ 'ብስቕታ ዝሳቐዩ ዘለው ህዝብታት' ብዝብል ኣርእስቲ ኣብ ዘውጽኦ ጸብጻብ፣ መንግስቲ ኤርትራ፣ ዝኾነ ናይ ረድኤት ትካላት ናብታ ሃገር ከይኣትዋ ብምእጋዱ፣ ኣበርክቶ ክገብር ከምዘይክኣለ ኣፍሊጡ።

ኣብ ዶብ ኢትዮጵያን ደቡብ ሱዳንን ኣብ ዝተኻየደ ግጭት ብውሕዱ 10 ሰባት ተቐቲሎም

Radio Erena: 19 January 2017

Gambe

ካብ ዓሌት ሙርለ ዝኾኑ ዕጡቓት ደቡብ ሱዳን፣ ኣብ ዶብ ኣብ ዝርከብ ክልል ጋምቤላ ናይ ኢትዮጵያ፣ ኣብ ልዕሊ ዝርከቡ ተወላዶ እቲ ከባቢ ብዝፈጸምዎ መጥቃዕቲ ብውሕዱ 10 ሰባት ከምዝቐተሉ ምንጭታት ዜና ካብቲ ከባቢ ሓቢሮም።

እቶም ዕጡቓት ደቡብ ሱዳን፣ ብሰንበት 15 ጥሪ ኣብ ዝፈጸምዎ መጥቃዕቲ ሓያሎ ቆልዑን ከብትን ዘሚቶም ከምዝኸዱ እቶም ምንጭት ብተወሳኺ ገሊጾም።

ጋምብያ፣ ሚኒስተራት ካብ ስልጣን ምውራድ ንዝሓንገደ ፕረዚደንት ይርሕርሑ

Radio Erena: 19 January 2017

Gamgam

ኣብ ምርጫ ዝተሳዕረ ፕረዚደንት ጋምብያ ያሕያ ጃምህ፣ ካብ ስልጣን ከምዘይእለ ደጊሙ ድሕሪ ምርግጋጹ፣ ሕብረት ኣፍሪቃ ከም ወግዓዊ መራሒ እታ ሃገር ንኸይቅበሎን፣ ወትሃደራዊ ምትእትታው ክፍጽምን ጻዕርታት ይቕጽል ኣሎ።

እቲ ብወትሃደራዊ ዕልዋ ዝመጸን ን22 ዓመታት ከኣ ነታ ሃገር ዝመርሐን የሕያ ጃመህ፣ ኣብ ምርጫ ከምዝተሳዕረ ተኣሚኑ ስልጣን ንምርካብ ተዳልዩ እኳ እንተነበረ፣ ድሒሩ ሓሳቡ ብምቕያር'ዩ፣ ካብ ስልጣን ከምዘይእለ ዝገልጽ ዘሎ።

ኤርትራ፣ 51 ሃገራት ካብ ዝሳተፍኦ መጻረዩ ግጥማት ዋንጫ ኣፍሪቃ 2019 ትግለል

Radio Erena: 18 January 2017

CAF

ብህድማ ተጻወቲ ኩዕሶ እግሪ ዝተዳኸመት ኤርትራ፣ ኣብ ካሜሮን ኣብ ዝእንገድ ዋንጫ ኣፍሪቃ 2019 ከምዘይትሳተፍ ተረጋጊጹ።

CAF ኣብ ዘቕረቦ ዝርዝር ናብቲ ዕጫ ዝተሳተፋ 51 ሃገራት፣ ኤርትራ የላን።

ኤርትራ፣ ካብ ግጥማት ዋንጫ ኣፍሪቃ ዝተገለለትሉ ምኽንያት፣ ፈደረሽን ኩዕሶ እግሪ ኤርትራን ይኹን ካፍ ወግዓዊ መግለጺ እኳ እንተዘይሃብሉ፣ ከም ናይ ዝሓለፈ እዋናት ብፍቓዳ ስሒባ ክትከውን ከምእትኽእል ይግመት።

ሓይልታት ጸጥታ፣ ኣረጊት ናቕፋን ናይ ወጻኢ ባጤራን ወኒኖም ጸኒሖም ንዝበልዎም ሓያሎ ኤርትራውያን ይኣስሩ

Radio Erena: 18 January 2017

Bank

ሓይልታት ጸጥታ መንግስቲ ኤርትራ፣ ዘይሕጋዊ ባጤራታት ወኒኖም ጸኒሖም ንዝበልዎም ሓያሎ ኤርትራውያን ይኣስሩ ምህላዎም ምንጭታት ሬድዮ ኤረና ሓቢሮም።

እቲ፣ ሓይልታት ጸጥታ መንግስቲ ዘይሕጋዊ ዝብልዎ ዘለዉ ባጤራታት፣ ናይ ቀደም ባጤራ ናቕፋ፣ ዶላርን ኤውሮን ዘጠቓለለ'ዩ።

መንግስቲ፣ ካብ ቁጽጽሩ ወጻኢ ንዝኸደ ባጤራ ናቕፋ ንምቕያር ኣዋጅ ድሕሪ ምውጽኡ፣ ኣብ መንጎ'ቲ ዝተቐየረን ኣሪግትን ናቕፋ ናይ ዕለት እንተዘይኮይኑ ካልእ ፍልልይ ስለዘይብሉ፣ ኣረጊትን ሓድሽን ናቕፋ ተሓዋዊሱ ኣብ ዕዳጋ ተዘርዩ ከምዘሎ ኣቀዲሙ ክግለጽ ጸኒሑ'ዩ።

ትልሂት ንምቕራብ ናብ ኣውስትራልያ ካብ ዝኸደት ጉጅለ ባህሊ ህግደፍ፣ ስዒድ ዓብደላ ዑቕባ ንምሕታት ተሪፉ

Radio Erena: 17 January 2019

Said Abdella

ኣብ ኣውስትራልያ፣ ሙዚቃዊት ትልኢት ንምቕራብ ካብ ዝኸደት ጉጅላ ባህሊ ህግደፍ፣ ህቡብ ድምጻዊ ስዒድ ዓብደላ ዑቕባ ንምሕታት ኣብታ ሃገር ከምዝተረፈ ምንጭታት ሬድዮ ኤረና ኣረጋጊጾም።

ብቋንቋ ትግረ ካብ ዝልሃዩ ህቡባዊ ኤርትራውያን ድምጻውያን ሓደ ዝኾነ ስዒድ ዓብደላ፣ ተጋዳላይ ህዝባዊ ግንባርን ኣባል ባህላዊ ጉዳያት ህግደፍን ዝነበረ'ዩ።

ሱዳን፣ ምምላስ ኤርትራውያን ስደተኛታት ትቕጽል

Radio Erena: 17 January 2017

Borer pat

መንግስቲ ሱዳን ካብ ዝሓለፈ ዓመት ኣትሒዙ ከተግብሮ ዝጸንሐ ምምላስ ኤርትራውያን ስደተኛታት ናብ ኤርትራ ይቕጽሎ ከምዘሎ ምንጭታት ሬድዮ ኤረና ሓቢሮም።

ኣብ ዝሓለፈ ሰሙን፣ ኣብ ዶብ ኤርትራን ሱዳንን ዝተቐየዱ 10ታት ኤርትራውያን ናብ ሓይልታት ሰራዊት ኤርትራ ከምዘረከበት ዝሓበሩ እቶም ምንጭታት፣ ኣብ ኣብያተ ማእሰርቲ እታ ሃገር ዝርከቡ ኣማኢት ኤርትራውያን'ውን ከይትመልሶም ተሰጊኡ ምህላዉ ሓቢሮም።

ኤርትራዊ ሽወደናዊ ኣሌክሳንደር ኢሳቕ ምስ ሪያል ማድሪድ ክጽንበር'ዩ

Radio Erena: 17 January 2017

Alex

ኣብ ታሪኽ ሃገራዊት ጋንታ ኩዕሶ እግሪ ሽወደን ብዕድመ ዝነኣሰ ተጻዋታይ ኮይኑ፡ ዝሓለፈ ሰንበት ኣብ መበል 17 ዓመትን 109 መዓልታትን ዕድሚኡ ኣንጻር ኣይቮሪኮስት ዝተሰለፈ ኤርትራዊ ሽወደናዊ ኣሌክሳንደር ኢሳቕ፣ ዓባይ ክለብ ሪያል ማድሪድ ምስኣ ክትጽንብሮ ኣብ ስምምዕ ከምዝተበጽሐ ይግለጽ ኣሎ።

ብ“ናይ መጻኢ ዝላታን” ዝፍለጥ ኤርትራዊ ሽወደናዊ ኣሌክሳንደር ኢሳቕ፣ ምስዛ ዓባይ ስጳኛዊት ክለብ ንምጽንባር ዝተበጽሐ ናይ ገንዘብ ውዕል 10 ሚልዮን ኤውሮ ምዃኑ'ውን ዝተፈላለያ ማዕከናት ዜና ስፖርት ይጠቕሳ።

ተጻዋታይ ክለብ AIK ኣሌክሳንደር ኢሳቕ ምስ ሪያል ማድሪድ ንምጽንባር፣ ኣብዚ ሰሙን'ዚ ናይ ሓሙሽተ ዓመት ውዕል ክፈራረም እዩ።

ኣብ ጁባ፣ ብዘይሕጋዊ ፍቓድ ተወኒኑ ዝጸንሐ 1200 ጠበናጁ ተኣኪቡ

Radio Erena: 17 January 2017

Guns

ሓይልታት ጸጥታ ደቡብ ሱዳን፣ ዘይሕጋዊ ኣጽዋር ንምቁጽጻር ገዛ ገዛ እናኣተው ኣብ ዘካየድዎ ተፍትሽ 1200 ጠበናጁ ከምዝሓዙ ገሊጾም።

ጸጥታ ከተማ ጁባ ንምርግጋእ ኣብ ዝግበር ዘሎ ጻዕሪ፣ ሰራዊት ደቡብ ሱዳን፣ ብዘይሕጋዊ መንገዲ ኣብ ኢድ ውልቀሰባት ንዝርከብ ጠበናጁ ንምቁጽጻር ተበግሶ ወሲዱ ይርከብ።

ኣብቲ ብሃንደበት ገዛ ገዛ ብምእታው ዝተኻየደ ተፍትሽ፣ 1200 ዝተፈላለየ ዓይነታት ጠበናጁ ከምዝተታሕዘ ጠቕላሊ ሓለቓ ስታፍ ሰራዊት እታ ሃገር ጀነራል ፖል ማሎንግ ኣረጋጊጹ።

ገዲም ተጋዳላይ ሓርነት፣ ዶ/ር ሃብተ ተስፋማርያም ዓሪፉ

Radio Erena: 16 January 2017

Habte Tes

ገዲም ተጋዳላይ ናጽነትን ተቓላሳይ ሓርነትን፣ ዶክተር ሃብተ ተስፋማርያም ዓሪፉ።

ዶክተር ሃብተ፣ ካብ መጀመርያ ወርሓት ናይዛ ዝሓለፈ ዓመት ኣትሒዙ፣ ብሕማም ክሳቐ ድሕሪ ምጽናሕ'ዩ ብዓርቢ 13 ጥሪ 2017 ዓሪፉ።

ኣብ ንኡስ ዕድሚኡ ኣብ ተጋድሎ ሓርነት ኤርትራ ዝተሰለፈ ዶክተር ሃብተ ተስፋማርያም፣ ኣብ እዋን ቃልሲ ንናጽነት ካብ ተራ ተጋዳላይ ክሳብ ብደረጃ ላዕለዋይ መሪሕነት ንህዝቡን ሃገሩን ዝተወፈየ ምንባሩ መዛግብቲ ቃልሲ ኤርትራ ይሕብሩ።

ሕ/ኤውሮጳ፣ ኤርትራ ናይ እትርከበን 22 ሃገራት መንገዲ ኣየር ናብ ክሊ ኣየሩ ከይበራ ዝእግድ ውሳኔ ኣናዊሕዎ

Radio Erena: 16 January 2017

Erilines

ኣገልግሎት ኣቭየሽን ሕብረት ኤውሮጳ፣ ኤርትራ ናይ እትርከበን 22 ሃገራት መንገዲ ኣየር ናብ ክሊ ኣየር ኤውሮጳ ከይበራ ዝእግድ ውሳኔ ኣናዊሕዎ።

ኣብ ድሕነት ተጓዓዝቲ መንገዲ ኣየር ዝከታተል ኮሚተ ሕብረት ኤውሮጳ፣ ካብ 22 ክሳብ 24 ሕዳር 2016 ብ ዘካየዶ ኣኼባ፣ ጉዳይ ናይተን ናብ ክሊ ኣየር ኤውሮጳ ከይበራ ኣጊዱወን ዝጸንሐ ሃገራት ሓደ ብሓደ ድሕሪ ምምርማር'ዩ፣ ኤርትራ እትርከበን 22 ሃገራት ናብ ኤውሮጳ ከይበራ ዝእግድ ውሳኔ ዘሐደስ ዘሎ።

መንገዲ ኣየር ኤርትራ፣ Airbus A320ዝዓይነታ ነፋሪት ካብ ኣርመንያ ብኽራይ ብምምጻእ ናይ ኤውሮጳ በረራታት ንምጅማር ውጥን ከምዝነበሮ'ዩ ዝግለጽ።

ኢትዮጵያ፣ ንኣዋርሕ ዝቐየደቶም ግብጻውያን ትለቕቕ፣ ን10 ዓመታት ዝቐየደቶም ክልተ ኤርትራውያን ክትፈትሕ ድማ ምሕጽንታ ይቐርብ

Radio Erena: 16 January 2017

KIdane Gama

ኢትዮጵያ፣ ብጥርጠራ ስለያን ምትሕብባር ምውላዕ ናዕብን ንኣዋርሕ ቀይዳቶም ዝጸንሐት ሰለስተ ግብጻውያን ናጻ ከምዝለቐቐቶም ሚኒስትሪ ጉዳያት ግብጺ ኣፍሊጡ።

እቶም ዝሓለፈ ሰሙን ካብ ቤት ማእሰርቲ ኢትዮጵያ ናጻ ዝወጹ ሰለስተ ግብጻውያን፣ ካይሮ ኣብ ዝኣተውሉ፣ ሰበ ስልጣን ሚኒስትሪ ጉዳያት ወጻኢ ከምዝተቐበልዎም ማዕከናት ዜና ግብጺ ሓቢረን።

ግብጺ፣ ኣብ ኢትዮጵያ ተቐይዶም ዝጸንሑ ሰለስተ ዜጋታት ንኽፍትሑ ከተካይዶ ድሕሪ ዝጸንሐት ናይ ኣስታት ሓደ ወርሒ ጻዕሪ ብናጻ ክፍትሑ ከምዝኸኣሉ'ዩ መግለጺ ሚኒስትር ጉዳያት ወጻኢ እታ ሃገር ዘመልክት።

Breaking News! መንግስቲ ኤርትራ፣ ሓያሎ ሰኣልቲ፣ ኣወሃሃድቲ ፊልም፣ ደረስትን ኣፍረይትን ይቕይድ

Radio Erena: 14 January 2017

LYE

ሓይልታት ጸጥታ መንግስቲ ኤርትራ፣ ኣብ ዓውዲ ስነጥበብ፣ ምፍራይ ፊልምን ሙዚቃን ተዋፊሮም ንዝርከቡ ሓያሎ ሰኣልቲ፣ ኣወሃሃድቲ ፊልም፣ ደረስትን ኣፍረይትን ይቕየዱ ምህላዎም ምንጭታት ሬድዮ ኤረና ኣረጋጊጾም።

ዛጊት በጺሑና ካብ ዘሎ ዝርዝር ኣስማት ናይቶም፣ ካብ ዝሓለፈ ቅንያት ኣትሒዞም እናተኣድኑ ተኣሲሮም ዘለዉ ሰኣልቲ፣ ኣወሃህድቲ ፊልምን ኣፍረይትን፣ መርሃዊ መለስ፣ ወነንቲ ዮናን ፕሮዳክሽን ዳኒኤል ኣብርሃምን ዮናስ ሰሎምንን ይርከብዎም።

ኣዛዚ ጸጥታን ሃገራዊ ድሕነትን ሱዳን ኣብ ኤርትራ ናይ ስራሕ ምብጻሕ ፈጺሙ

Radio Erena: 12 January 2017

Sudan Secu

ኣዛዚ ጸጥትን ሃገራዊ ድሕነትን ሱዳን፣ ጅነራል መሓመድ ዓጣ ኣልመውላ ዓባስ፣ ኣብ ኤርትራ ምብጻሕ ብምፍጻም ምስ ፕረዚደንት ኢሳይያስ ኣፈወርቂ ኣብ ክልትኣዊ ጸጥታዊ ጉዳያት ከምዝተዘራረበ ምንጭታት ሓቢሮም።

እቲ ጀነራል፣ ኣብዚ ሳልስቲ'ዚ ኣስመራ ኣብ ዝበጽሓሉ ካብ ፕረዚደንት ሱዳን ዑመር ሓሰን ኣልበሽር ዝተላእከ ደብዳቤ ናብ ፕረዚደንት ኢሳይያስ ኣፈወርቂ ኣብጺሑ።

Pages